BUDAK LALAMUNAN

BUDAK LALAMUNANImas téh budak awéwé rumaja manéhna boga karesep kana unga ingu sasatoan. Ari nu ayeuna keur dikukutna nyaéta hayam. Teu loba hayamna mah, ngan saukur sajodo, tapi éta hayam téh geus mimiti ngendog.

Hiji poé, isuk-isuk kénéh Imas geus ngaroris kandang hayamna. Ana belenyeh téh manéhna imut aya sapuluh siki endog nu gugulitikan di gigireun si bikang. Eta endog ku Imas dicokotan, terus diwadahan kana boboko buntung.

Éta boboko buntung ku Imas dikékélék terus dibawa leumpang mapay jalan Désa maksudna éta endog-endog téh rék dijual ka warungna ma Ecih. Disatengahing perjalanan  Imas eureun heula. Gék Imas diuk dihandapeun tangkal Caringin téa. Ari Bobokona diécagkeun tur ditunda dinatunjangeun sukuna.

Angin leutik ngahiliwir nebak kana awak Imas. Teu kanyahoan Imas téh Ujug-ujug lenggut-leunggut weh nundutan. Imas mimiti ngumbar lamunan “Bagja teuing diri Kuring”  gerentes haténa. “Késang badag késang leutik dina miara si kukut téh ayeuna geus bukti hasilna si kukut geu méré endog nu sakieu baradagna. Ah hanjakal maké kudu dijual. Coba lamun dipegarkeun mah tangtu bakal ngahasilkeun anu leuwih mucekil. Kuring yakin, sakabéh endog téh bakal megar bakal jadi anak hayam  nu lalucu. Bakal séhat-séhat tur marontok.

Éta anak hayam téh bakal diurus  dihadé-hadé. Rék dipiara di dama-dama, sapuluh siki rék dijadikeun bibit deui . nu sejena rek dijual. Duitna rek dibeulikeun kana domba sajodo, mon geus anakan loba rék dijual, duitna rék dibeulikeun kana munding sajodo, éta munding rék dipiara deui, mun geus loba rék dijual. Hasilna rék dibeulikeun kana mobil.

Det…..det……det…… Asik, kuring nyupiran. Gampang geuning. Ukur tinggal muih-muikeun setir jeng nincak gas, éit aya budak nu meuntas tin….tin…tin…. sora klakson ku kuring dipencét, dasar budak, meuntas téh teu rarat-reret heula, untung erémna pakem”.

Imas ngajejekeun sukuna, maksudna rék nincak erém, satarikna, Ngan orokaya, nu dijejekna lain erem tapi endog saboboko. Barang sadar……. Imas colohok endogna peupeus kabéh.

Disalin tina buku Lantera Basa, Pangajaran Basa Sunda Pikeun SMP, Kls VII